كاريكاتير: آخر ما كاين في تنصابت.. زكريا المومني في مهمة سرية بدولة قطر

المنبر المغربية :

زكريا المومني تالف ومريض و معصب…القضية عندو صعيبة وصعيبة بزاف..مابقا لا ياكل ولا ينعس…فالمونديال المملكة البنانية كيف كيسميها زكريا طلعات واعرة وغلبات مملكة بلجيكا ومملكة إسبانيا و مملكة كندا (فيدرالية كندا تابعة للتاج البريطاني)..فالمغرب الملك فرحان الشعب فرحان..فالخارج الجالية فرحانة.. فالعالم العرب و لمسلمين فرحانين الأفارقة…النصارى..اليهود..

زكريا مابقاش كينعس وإذا نعس كيدير  كوشمار كحل …يا الله كيبدى يحلم ب 5 مليار  ويبدا  يحسبهوم  كتشعل فيهوم العافية و كيوقف عليه الفقيه الركراكي لابس لحمر ومعاه جيش ديال لعبيد ولعياشة لابسين لخضر كيخنزرو فيه وتيقولو ليه بواحد صوت مخيف و مرعب:  زكريا علاش مادرتيش النية..علاش مابغيتيش تحبس لكدوب والتشلهيب..ها علاش لكدبة ديالك ضربات ف poteau و تفرشات وتفضحتي و بقيتي مزلوط.

زكريا كيفيق مخلوع  غادي يحماق..جاب الله عندو شي قرقوبيات كان عطاهوم ليه علي لمرابط كيداويو على لحماق..زكريا  خاصو شي حل.. عيط ف التليفون لزيان جاوبو سطوندار ديال لعرجات خاف وقطع التلفون..عيط لحاجب لقا الخط مقطوع حاجب مامخلصش l’abonnement و فالأخير عيط لفسحة تشاور معاه على واحد  الحيلة جهنمية لي غادي تخرجو من هاد الأزمة النفسية والعقلية.

زكريا جبد داكشي لي بقى ليه من 10  آلاف أورو و سيفطهوم للمخلوض فسحة لي قدر يجيب ليه من  molenbik باسبور جديد مشا به زكريا لقطر بهوية مزورة:

– الاسم:  لعياشي لعبد

-المهنة: مستشار بوزارة الشبيبة و الرياضة المغربية.

الجنسية: مغربي

غير وصل لقطر زكريا المومني تاصل بداك الفرنساوي العطاي ديالو  ولي عطاه معلومات حصرية على الفندق السري لي  فيه عناصر الفريق الوطني المغربي و الغرفة لي نازل فيها اللاعب لي زكريا عندو بيه الغرض… من هنا غادي تبدا الخدمة ديال زكريا.

زكريا  لبس كاسكيط و  توني ديال المغرب  و دخل اوطيل ..ماعندوش مشكل ف حواجز المراقبة حيت  راه دابا مسؤول مغربي كيف مكتوب ف الباسبور لمزور وثانيا لمغاربة طالعة ليهوم كولشي كيرحب بيهوم..

منين وصل لواحد شومبرة  دخل ليها… تما بقا جالس مخبي حتى دخل ياسين بونو فرحان و كيغني “صوت الحسن ينادي”..

زكريا : سمح لي سي بونو إلا كنت خلعتك..جيت ل عندك حيت أنت مواطن كندي بحالي  وشفت التصريح ديالك لي كتقول فيه “عاش الشعب” وبغيت ندير معاك استجواب.

– بونو : ما خلعوني حتى لبينالتيات ديال سبليون بقا لي غير نتا شكون نتا بعدا.

– زكريا: أنا زكريا المومني البطل العالمي ديال light contact ودابا أنا مناضل ولاجئ ف كندا واش معرفتينيش؟

– بونو.(ضاحكا ): عرفتك عرفتك..أنت لي كونتي ف light  contact و دابا قلبتيها ل  تعطايت contact مع الجزائر و فرنسا..ياك نتا لي قطعتي الباسبور المغربي وهجمتي على الحفلة ديال المغاربة فكندا و النهار كامل ونتا كتسب المغاربة فاليوتوب.

زكريا: لا سي بونو ما تاخودش فكرة غالطة علي أنا مناضل حقوقي وأنا  ماكنسبش الشعب أنا كنسب المسؤولين ونتا سي بونو قولتي عاش الشعب إذن أنا وياك بحال بحال..

بونو : أولا أنا مغربي وديما غادي نبقى مغربي و أنا لي كنعرف الملك والشعب بحال بحال..الملك القوة ديالو من الشعب والشعب القوة ديالو من الملك..إذن لي كيسب الملك  كيسب الشعب..داكشي علاش قلت عاش الشعب المغربي حيت حنا عائلة وحدة بحال لي تيقول لينا الركراكي..فهمتي؟

زكريا: هداك الركراكي راس لافوكا رآه عبد مدسوس ما تيقوش فيه.

بونو:  الركراكي راس لافوكا مرضي الوالدين و كيموت على  المغرب وناجح فحياتو و فخدمتو..ونتا راس الفتنة مسخوط الوالدين ومسخوط الشعب ما عمرك  طفرو.

زكريا: ok دابا مابغيتيش دير معايا حوار عطيني غير 1000 أورو نرجع لكندا خوك رآه مقطع.

ياسين بونو (كيضحك بمكر بحال ف ضربات الجزاء) جبد 10 آلاف أورو وصدقها ف سبيل الله على زكريا لي خدا لفلوس فرحان وبدا كيحسبهوم…شوية بونو جبد ستيلو و عطاه ل زكريا وقاليه سيني ليا على هاد الورقة غير باش ميكونش عندي شي مشكل مع الديوانة…. فهاد اللحظة زكريا هز عينيه ف بونو  و بدا كيقفقف و يترعد…لاح ستيلو  لاح لفلوس..بدا كيبكي وخرج كيجري وكيغوت “بغيتو عاودتاني تقولبوني بغيتو تقولبوني..براكا عليا الشوهة لقديمة”..خرج من شموبرة هربان و بونو تابعو كيضحك و كيقوليه ” وا  زكريا دير النية..دير النية هادو غير فلوس صدقة من عندي… شفتي فلوس تنصابت لي كونتي خديتي خرجو ليك لعقل…فين ما مشيتي سابقينك فضايحك الله يعفو عليك.




قم بكتابة اول تعليق

أترك لنا تعليق

لن يتم نشر بريدك الالكتروني في اللعن


*


53 − 48 =