زيان و ” رباعتو ” في ورطة بعد اعترافات نورزينو

المنبر المغربية :

الرعب راكب العصابة ديال محمد زيان، واحد اليوتوبر مقيم ف إسبانيا كانو مشاركين معاه زيان و وهيبة و حاجب فشي فضايح وأسرار خايبة بزاف و كانو معولين عليه يولي المراسل ديالهوم فهاد لبلاد…هاد اليوتوبر لي معروف باللقب ديال  نورزينو  دار ليهوم الخطة ديال راس لافوكا بقى راجع اللور راجع اللور و خلاهوم  حتى جاو عندو و خواو ليه لمزيودة كولها  ومنين شافهوم  عياو  و راس الحربة ديالهوم زياش (عفوا زيان) ما بقاش لاعب (تشد) خرج و هجم عليهوم و شرملهوم و شوهوم.

زكريا المومني وصلاتو لخبار و قرر ياخد المبادرة  باش يعتق صحابو  حيت حتى هو داخل فهاد المعمعة وفهاد الفضيحة..زكريا عيط لمحمد حاجب  باش ينسقو بيناتهوم..لسوء حظو  لقى حاجب كاعي وماشي ف نهارو وعلى سبة..صافي حاجب  بدا كيفكر  ينساحب من لعصابة….داكشي علاش غادي يجاوب زكريا  ببرودة و وبتهكم  و بحشيان لهضرة حيت عرف النهاية قربات.
سلام خاي حاجب  يومين وانا كنعيط  ليك و مكتجاوبش واش شفتي هاداك صاحبنا ديال اسبانيا رآه تقلب علينا و فضحنا.
سلام خاي زكريا سمح ليا تلفون ديالي كان  مقطوع مامخلصش  الإشتراك   أنا دابا غير خاون الويفي ديال واحد جاري كافر بالله. فعلا شفتو  أخاي زكريا شفتو  هداك لي ماكيتدكرش ياك؟
ما كايتدكرش!! خويا راك  غالط كولشي ولى كيدكرو وكيهضر  عليه رآه  فرشنا و فضحنا..مشينا فيها أخاي حاجب.

مشينا فيها؟ را مشينا فيها من شحال هادي..منين حصلتي نتا كتحسب فلوس لمخزن ومنين تفرشات لكدبة ديال التعذيب ديالي ومنين تشد سي زيان…من شحال هادي و حنا غاديين ف الخسران ومبغيناش نعيقو.

ماشي مشكل المهم نبقاو دايرين النية و نشوفو كيفاش نفكو هاد الحصلة ماحد لعبيد ولعياشة  مشغولين مع الاستقبال ديال المنتخب..خاصنا ندافعو على راسنا..

ماتفكرنيش أخويا فهداك  الإستقبال ديال الرباط ضرني خاطري بزاااف…ملايين ديال العبيد ولعياشة.. واصاحبي واش شفتي هداك  الحموشي كيفاش جا مع الصباح بكري واقف على شغلو واش ماكيعياش هاهو فالبيرو ها هو ف الميدان هاهو ف الإرهاب ها هو فالجريمة هاهو فالعمرة ها هو ف قطر ..فمريكان…فاسبانيا.. داك النهار درت التقية و دعيت مع المنتخب باش يرضاو علي العياشة ساعا عاقو بيا وقالو لي راني منحوس ومنجوس أنا راني مرضت وليت كنفكر نرجع لأفغانستان ونقطع الحس.

وياااه غير خليها على الله..حتى أنا مرضت منين شفت الكار داز  حدا  حسان تفكرت الشوهة ديالي.. شوف نتاصلو  بهاداك نورزينو و نقولو ليه غير يحبس بلا ما يزيد يفرشنا وحنا غادي  نسيفطو ليه لفلوس باش يسكت.

لفلوس اشمن فلوس؟ انا تنقوليك مقطوع ليا التليفون حيت مامخلصوش ونتا كتقول لفلوس..عيط نتا لوهبية وقوليها تشوف حل لهاد المصيبة.

فكرت أخاي حاجب فيها كتبت ليها 11 ميساج ما جاوبتنيش  ل دابا.
ضحكتني و كترة الهم كتضحك واش نتا مسيفط ليها 11 ميساج وبغيتيها  تجاوبك..سيفط ليها 15 أو 20 ميساج  فوت غير الرقم 11واش نسيتي را عشيرها سي زيان دخل الحبس على ود 11 شكاية.

عشيرها شفتك قولتي سي زيان عشيرها؟
و شنو كيحساب ليك  عنداك تكون متيق ..هو عاود ليا كولشي غير  أنا قلت مادام المخزن هو العدو ديالنا نسترو على بعضياتنا.

خاي حاجب أنا شفت اللقطة ديال زيان   مع وهيبة فلوطيل خصوصا فاش كانت واقفة مورا ظهرو عريان شنو زعما كانت كدير تما أنا بانت ليا وقفة عادية؟

كانت واقفة مورا ظهرو عريان كتقلب على الميكرو لي مالقيتيهش نتا…واش كتضحكو علي نتوما فيكوم اللعنة ديال لوطيلات وانا داير فيكوم راسي حتى جبتها فراسي.

دابا شنو نديرو مع هاد نورزينو جاوبني عفاك وبلا عصبية وبلا حشيان  لهضرة.

بغيتي الصراحة  أخاي زكريا أنا قررت نوقف هاد لكدوب ونعتارف بكولشي منين فرشنا هاد نورزينو…غادي نعتارف حتى بداك شي لي ف ظهري وكيفاش درتو.. .اللهم نعتارف بالحقيقة  قبل ما الناس يمشيو  بعيد و يبداو يشكو فيا…هاد نورزينو خرج لينا من جنب…غادي يرجعنا كلنا ماكندكروش..لا عند عيالاتنا ولا عند ولادنا  ولا صحابنا…غادي يسيفطنا كولنا ريفولي(refoules) و على كروشنا…ما شي حتى على رجلينا…

عندك الصح خاي حاجب…أنت لي كونتي ديما مصدع لينا راسنا بالقضية فيها إن غادي نوليو  كلنا فينا إن….اللهم تبقى فيك غير نتا….ما لقيتي فين دير طبايع غير  فظهرك؟ القضية فيها نيت إن…دابا كل واحد يضرب على راسو.

من بعد النصاب زكريا قال  مع راسو أرا نتاصل بنورزينو  ونقول ليه يفوتني غير أنا و يطحن كولشي..منين عيط ليه فالتلفون  ما ماجوبوش نورزينو …جاوباتو la boîte vocale نورزينو داير اغنية ديال المونديال ” هالا هالا هالا لمغاربة سبوعا   ورجالا”….زكريا تصدم و حط التليفون وقال ” فعلا لمغاربة سبوعا و رجالا و حنا  (وهيبة- حاجب- زيان) لي طلعنا ضبوعا وجوهالا..




قم بكتابة اول تعليق

أترك لنا تعليق

لن يتم نشر بريدك الالكتروني في اللعن


*


+ 8 = 10